الجده وحفيدها - الجزء الثاني
الباحث سمير الاحمد
بدي اجعل حالي غبي .. غبي و ما اسمعتوش.
لا ... والله شاطر كثير
كون بتفكرني عجوز امخرفنه ياجده..
وبتقول في قلبك والله ما هي عارفه شو صار في هالدنيا .
اسمع ياجده.. وعيب على هالعقصه الطاهره اذا ما ببيع خمسين من شكلك..
ولك انا انتصار عشت وشفت كل اللي صار.. واللي بدو يصير لولاد اولادك.
شو... بدو يصيرلهم.. اكثر من اللي صاري؟؟؟
خلي اللي في القلب .. في القلب... يا جده.
الله يرحمو سيدك خالد ابو عكازه..
ما كان ينام وفي واحد صاحي في ساكيه.
اليوم البلد حاكمها ولد .. والكبير قبل الصغير بيناموا قبل النسوان.
تعيشي يا جده.. مهو انتي قبرتيه وارتحتي منو.
قبر اللي يقبرك.. والله عكازته .. لليوم وبكره الها هيبه
أكثر من هالحدايد اللي في ايديكم.ويا مشطركم على بعض.
الله يرضى عليكي يا جده اسكتي بلاش حد يسمعنا
ونروح في داهيه..
داهيه اللي توخذك انت واللي يزيك.. هذا اللي فالحين فيه..
حط راسك بين الروس... والايد اللي ما بتقدر عليها بوسها وادعي عليها بالكسر..
ومن خاف سلم.. واللي بوخذ امي بقلو يا عمي..
الله يخزي هيك تربيه.
وين المؤمن القوي خير من المؤمن الضعيف.. واللي بيرشقك في المي برشقه في الدم..
وين المعتصم والحجاج..وخالد وبلال واسماء وهند.
وين الساكت عن الحق..
كل ها الاسامي ياجده لو انها اليوم موجوده ما بتسمعي عنهم الا في جوانتينامو..
اسمحيلي يا جده ابعد عنك.. انتي مع الارهاب.
ارهاب في عينك وعين اللي خلفوك..
روح البس تنوره وقصرها ولا بنطلون طيحني..
ولك بنت من بنات زمان بتسوى الف من شكلك.
هات العسمليات .. والله خساره فيك.
بدي اعطيهن لسعدات..فيهن رح يكمل مشوار سيدك خالد الله يرحمه.
مبروكات عليكي وعلى سعدات..
والله يا روح ما بعدك روح.
اسمع يا ولد.. هالحين عرفت وين الارهاب.
وين يا جده؟؟؟
الارهاب معشعش في قلوب اللي زيك من الطحين الامريكاني والدولار واليورو
والبنك الدولي والعولمه والاشتراكيه والراسماليه..
هذا هو الارهاب با جده.
على الله اتكون افهمت.. والا عمرك ما تفهم.
على رأي حداد الله يرحمو..
انا راجع ارعى الغنـم... واحكي القصه للبهـم
بلكي ان فهمو البجـم ... وفهموني.. برجع ليك.
هو يا جده ما في حدا عندك عايش... كلو الله يرحمو.
لأ.. في ياجده.. بس لو اقلك عن واحد منهم..
انت اول واحد بيجيب سم وبيحطلي اياه في الاكل.
خليهم في علم الغيب..
واللي زيك بيموت ميت مره حتى يعرف واحد منهم.
حيرتيني يا جده.. كيف بدك اصير رجل
وانتي بتخبي عني حتى اسم واحد منهم.
ايوا .. كل بعقلي حلاوه
ولك انا قلتلك ببيعك خمسن مره وانت واقف.
روح اسال معلمينك اللي عايشين في القصور.. بيعرفوهم اكثر مني.
وعلى رأي العندليب كمان الله يرحمو.. لما قال
والقصر كبير يا ولدي.. وكلاب تحرسه وجنود.
مشان الله يا جده احكيلي عن واحد حي..
الله يصلحك يا جده .. هو في حدا بيموت..
هو اللي بيغيب عن عينك وبنحط تحت التراب يعني مات؟
تحت التراب يا جده في حياه اسمها النعيم
للي عاشوا في الدنيا من اجل الحق.
وفي حياه والعياذ بالله اسمها الجحيم ..
للي عاشوا في الدنيا من اجل الباطل.
وفي الحالتين اسمها حياه.
بتعرفي ياجده .. لو تروحي على الجامعه ليعطوكي شهادة الدكتوراه.
ماشي يا جده... بدنا نرجع نسوق الهبل على التياسه.
هو بعد ما شاب.. ودوه على الكتاب.
جامعاتكو ما وصلو محو الاميه ايام سيدك الله يرحمو.
في محو الاميه .. كنا نحفظ القران الكريم غيبا.
في محو الاميه كانت عندنا الامم الاخلاق.
في محو الاميه اتعلمنا اكرام الجار ولوجار واكرام الضيف وطاعة الوالدين.
في محو الاميه كان الغني والفقير يلبس نفس الزي..
مش زي اليوم كل يوم سياره شكل وشفير شكل.
في محو الاميه كاد المعلم ان يكون رسولا..
مش بنشرب شاي وسيجاره سوا على القهوه.
في محو الاميه كانت قلوبنا على بعض..
مش سيوفنا على بعض.
انشاء الله تكون فهمت يا جده؟؟؟؟؟
والله يا جده كل مره بتصعبي الاسئله بزياده.
بعد هالحكي هاي شهادتي بدي ابلها واشرب ميتها.
وكل يوم بدي آجي عندك عشان تعطيني درس في محو الاميه.
majles_139006@yahoo.com
www.majls.jeeran.com
samsam442@gmail.com
ليست هناك تعليقات:
إرسال تعليق